آپ جس کیفیت میں ہیں واقعی ہمدردی کے قابل ہے لیکن درست جواب یہی ہے کہ آپ آزمائش میں ہیں اور اس کیفیت سے گزرنے کے لئے بہترین مشورہ یہی کہ آپ صبر ایمان ،اور اللہ پر یقین کے ساتھ اس آزمائش کو گزاریں ۔

آپ کو اس کیفیت کو سمجھنے کے لئے چند چیزیں بتاتا ہوں

1. ماحول کی خرابی

آج کا زمانہ زیادہ تر بگاڑ کا شکار ہے۔ ہمارا معاشرہ، سیاست اور معیشت سب اس طرح ڈھلے ہیں کہ برائی کرنے والوں کو سہولت ملتی ہے اور نیک چلنے والوں کے لیے رکاوٹیں پیدا ہوتی ہیں۔ یہ فطری ہے کہ جب آپ بہاؤ کے مخالف چلیں گے تو مشکلات آئیں گی۔ لیکن یہی مشکلات دراصل آپ کے ایمان کا امتحان ہیں۔اور یہ نظام تب تک چلے گا جب تک تمام نیک لوگ مل کر اس کو بدل نہیں دیتے ۔ماضی کی اسلامی حکومتوں کو اگر دیکھا جائے تو اس میں یہ نظام تھا جس میں نیک لوگوں کی حوصلہ افزائی ہوتی تھی اور نیک لوگ بھی آسودہ زندگی بسر کرتے تھے۔

2. نیکی اور برائی کی حقیقت

نیکی ہمیشہ محنت مانگتی ہے۔ یہ ایسے ہی ہے جیسے پہاڑ پر چڑھنا، جس کے لیے محنت اور ہمت چاہیے۔ جبکہ برائی ایسے ہے جیسے ڈھلوان پر لڑھک جانا، جس کے لیے کوئی خاص کوشش نہیں چاہیے۔ اسی لیے برائی بظاہر آسان اور نیکی مشکل لگتی ہے۔

3. امتحان کا مقصد

آپ نے کہا کہ اگر نیکی کی راہ میں تکلیف ہوتی ہے تو کون اس راہ پر چلے گا ؟ اب میں پوچھتا ہوں کہ اگر نیک راہ میں سہولتیں ہوتیں اور برائی کرنے پر آفتیں ٹوٹ پڑتیں تو کون بے وقوٖف برائی کی راہ پر چلتا ۔اب ہوتا یوں کہ کامیابی آسان اور ناکامی مشکل ہو جاتی جزاء مفت ہوتی سزا کے لئے محنت کرنی پڑتی۔انعام مفت ملتا اور عذاب کے لئے محنت کرنا پڑتی۔

اب یہ بتائیے کہ اس طرح نیک لوگوں کی نیکی کی قدر کیا ہوتی ؟ جبکہ نیکی کے راستے قالین بچھا کر طے کیئے ہوں ۔اس صورت حال میں تو یقینا جہنم میں جانے والے قابل قدر لوگ ہوتے جنہوں نے جہنم میں جانے کے لئے محنت کی ہوگی ۔

کیا اس کے بعد انسان کو اس دنیا میں بھیجنے کا کوئی فائدہ ہوتا۔

4. فائدہ اور نقصان صرف انسان کا ہے

آپ کے سوال سے ایسا محسوس ہوتا ہے کہ جیسے نیک راہ پر چلنے والوں سے اللہ تبارک وتعالی کی کوئی غرض وابستہ ہے ۔ اوراسی وجہ سے آپ نے یہ سوال کر دیا کہ اگر نیکی کا راستہ اتنا ہی مشکل ہے تو لوگ اس راہ پر کیوں آئیں گے۔ حقیقت حال یہ ہے کہ اللہ تبارک و تعالی نے دو صورتیں بیان فرمائیں کہ یہ خیر کا راستہ ہے جس راستے پر چلنے سے دنیا میں تو تنگی ہوگی لیکن آخرت میں اس کی جزاء ابدی ہوگی جس میں انواع و اقسام کی نعمتیں انسان کو ہمیشہ ملتی رہیں گی اور دوسری صورت شر کی ہے کہ جس پر چلنا آسان اور دنیا میں فائدہ مند ہوگی لیکن اس کی سزاء لافانی ہوگی ۔اب یہ دو صورتیں ہیں انسان چاہے تو خیر کا راستہ اختیار کرے اور چاہے تو چند روزہ زندگی کے مزوں کے لئے خیر کا راستہ کرے ۔

اللہ تبارک و تعالی ہمیں صراط مستقیم پر چلنے کی توفیق عطا فرمائے۔۔آمین

پڑھیں / ایمانیات

اچھےکام کرنےوالوں کی زندگی تنگ کیوں ہوجاتی ہے؟

فہرست

سوال

جواب

فہرست