جدیدیت: انسانی تاریخ کا سب سے ہمہ گیر تہذیبی انقلاب ـ سلسلہ تفہیمِ فکرِ مغرب (³)

Modernity: The Greatest Civilizational Revolution in Human History

کسی بھی سنجیدہ علمی و فکری بحث کا آغاز بنیادی سوالات اور ان کے علمی تناظر (Conceptual Framework) کے درست تعین سے ہوتا ہے، اگر کسی موضوع کو دیکھنے کا بنیادی زاویۂ نگاہ ہی درست نہ ہو تو محقق معلومات کے انبار تلے دب کر بھی حقیقت کے جوہر تک نہیں پہنچ پاتا۔جدیدیت (Modernity) کے مطالعے میں بھی یہی بنیادی مغالطہ اکثر پیشِ نظر رہتا ہے، سوال یہ ہے کہ جدیدیت کو کس حیثیت سے دیکھا جائے؟ کیا یہ محض ایک فلسفیانہ نظریہ (Philosophical Theory) ہے؟ کیا یہ سیاسی، معاشی یا سائنسی ارتقاء کا کوئی غیر جانب دار عنوان ہے؟ یا اس کی حقیقت اس سے کہیں زیادہ وسیع اور گہری ہے؟ جدیدیت کو صرف چند نظریات یا تاریخی تبدیلیوں کا مجموعہ سمجھنا اس کی اصل نوعیت کو نظر انداز کرنا ہے، جدیدیت در حقیقت ایک ہمہ گیر تہذیبی منصوبہ (Civilizational Project) ہے، جس کا مقصد صرف سیاسی یا معاشی اداروں کی تشکیلِ نو نہیں بلکہ انسان، کائنات، علم، اخلاق اور سماج کے بارے میں بنیادی تصورات کو ایک نئے فکری سانچے میں منتقل کرنا تھا۔ اسی لئے جدیدیت کو سمجھنے کےلئے اس کے سائنسی یا سیاسی مظاہر کا مطالعہ کافی نہیں، بلکہ اس کی مابعد الطبیعیاتی بنیادوں کا جائزہ لینا بھی ناگزیر ہے ۔اگر انسانی تاریخ کے طویل فکری سفر پر نظر ڈالی جائے تو سلطنتوں کے عروج و زوال، سائنسی ترقی اور تہذیبی تغیرات کے باوجود تقریباً تمام روایتی معاشروں میں چند بنیادی اصول مشترک دکھائی دیتے ہیں، کائنات کو ایک غائی (Teleological) اور حکیمانہ نظام سمجھا جاتا تھا، انسان خود کو کسی برتر حقیقت (Transcendent Reality) کا پابند تصور کرتا تھا اور اخلاق کو انسانی خواہشات یا افادیت (Utilitarianism) کے تابع کرنے کے بجائے ایسے معروضی اصولوں (Objective Values) سے وابستہ کیا جاتا تھا جو انسان سے ماورا حیثیت رکھتے تھے، اس طرح معاشرے صرف مادی مفادات پر قائم نہیں تھے بلکہ مذہب، روایت، مابعد الطبیعات، اخلاق اور اجتماعی اقدار ان کی فکری بنیادیں شمار ہوتی تھیں، جدیدیت کی انفرادیت یہ نہیں کہ اس نے محض سیاسی یا معاشی تبدیلیاں پیدا کیں بلکہ اس کا اصل امتیاز یہ ہے کہ اس نے علم، حقیقت، انسان اور اخلاق کے مروجہ تصورات کو ازسرِ نو متعین کرنے کی کوشش کی، اس تناظر میں جدیدیت کا مقدمہ چند بنیادی اصولوں پر استوار نظر آتا ہے ۔

عقلیت پسندی (Rationalism)

اس تصور کے مطابق انسانی عقل (Human Reason) اپنی ذات میں خود مکتفی (Self-sufficient) ہے اور وحی یا کسی مابعد الطبیعیاتی رہنمائی کے بغیر بھی زندگی کے تمام شعبوں کےلئے اصول و ضوابط وضع کرنے کی صلاحیت رکھتی ہے ۔

تجربیت (Empiricism)

علم کا معتبر سرچشمہ صرف وہ تجربہ قرار پایا جو حواس اور تجرباتی مشاہدے کے ذریعے قابلِ تصدیق ہو، اس نقطۂ نظر کے نتیجے میں وہ تمام حقائق جو تجرباتی دائرے سے باہر تھے، علمی حیثیت کے اعتبار سے ثانوی یا ناقابلِ تحقیق سمجھے جانے لگے ۔

سیکولر ریاست (Secular State)

اجتماعی اور سیاسی نظم کو مذہبی یا مابعد الطبیعیاتی بنیادوں سے الگ کر کے ایک ایسے سیاسی معاہدے پر استوار کرنے کی کوشش کی گئی جس کی بنیاد انسانی ارادہ اور اجتماعی مفاد ہو، نہ کہ وحی یا مقدس روایت ۔

مادیت پر مبنی تصورِ ترقی (Material Progress)

ترقی کا معیار انسان کے اخلاقی یا روحانی ارتقاء کے بجائے معاشی پیداوار، ٹیکنالوجی، صنعتی قوت اور مادی غلبے کو قرار دیا گیا۔

یہ کہنا درست نہیں ہوگا کہ جدیدیت کے تمام مفکرین ہر مسئلے میں متفق تھے، حقیقت یہ ہے کہ جدیدیت کے اندر متعدد فکری دھارے موجود ہیں اور ان کے مابین کئی بنیادی اختلافات بھی پائے جاتے ہیں تاہم ان اختلافات کے باوجود علم، انسان، ریاست اور ترقی کے بارے میں چند ایسے مشترک مفروضات ضرور موجود ہیں جنہوں نے جدید تہذیب کی عمومی سمت متعین کی۔ یہی مشترک بنیادیں بعد ازاں جدید ریاست، نوآبادیاتی نظام، تعلیمی اداروں، قانونی ڈھانچوں اور ذرائع ابلاغ کے ذریعے دنیا کے مختلف معاشروں تک منتقل ہوئیں ۔اسی تناظر میں یہ بات قابلِ غور ہے کہ اگرچہ دنیا کی تہذیبیں اپنی زبان، تاریخ اور ثقافت کے اعتبار سے ایک دوسرے سے مختلف ہیں لیکن ان کے ریاستی اداروں، تعلیمی نظاموں، قانونی تصورات اور ترقی کے پیمانوں میں غیر معمولی مماثلت پائی جاتی ہے۔ یہ مماثلت محض اتفاقی نہیں بلکہ اس عالمی تہذیبی رجحان کا نتیجہ ہے جسے جدیدیت نے جنم دیا ۔لاطینی امریکہ کے ممتاز فلسفی اینریک ڈوسل (Enrique Dussel) جدیدیت کو محض یورپی فکری تحریک نہیں سمجھتے بلکہ اسے ایک ایسا عالمی تہذیبی عمل قرار دیتے ہیں جس نے دنیا کے مختلف معاشروں میں علم، تاریخ اور انسانی شناخت کے تصورات کو نئی تشکیل دی، اسی پس منظر میں ان کا یہ تبصرہ کہ جدیدیت نے گویا اپنا ایک الگ "Geological Age" پیدا کر دیا، اس حقیقت کی طرف اشارہ کرتا ہے کہ جدیدیت نے صرف اداروں کو نہیں بلکہ انسانی شعور کی ساخت اور دنیا کو سمجھنے کے بنیادی زاویوں کو بھی متاثر کیا ۔

افادات: پروفیسر فصیح احمد

ضبط و ترتیب: مولانا محمد ثاقب

پڑھیں / جدیدیت

جدیدیت: انسانی تاریخ کا سب سے ہمہ گیر تہذیبی انقلاب

فہرست

تعارف

فہرست