قرآن کریم نے اللہ کی وحدانیت کے ثبوت میں صرف عقلی دلائل ہی نہیں دیے بلکہ مشاہداتی اور آفاقی دلائل کی طرف بھی رہنمائی فرمائی ہے، کیونکہ عام لوگوں کے لیے کائنات میں نظر آنے والے مظاہر کو سمجھنا زیادہ آسان ہوتا ہے۔ سورۃ الفاتحہ میں جب کہا گیا "رب العالمین" تو اس میں اسی حقیقت کی طرف اشارہ ہے۔ "رب" کا مطلب ہے: ہر چیز کو تدریجی طور پر نشوونما دے کر کمال تک پہنچانے والا۔ اب ذرا اس کائنات کی وسعت پر غور کیجیے۔ روشنی ایک سیکنڈ میں ایک لاکھ چھیاسی ہزار میل طے کرتی ہے، پھر ایک منٹ، ایک گھنٹہ، ایک دن اور ایک سال میں اس کی مسافت کا اندازہ کیجیے! اسی پیمانے پر جب ہم کائنات کی وسعت کو دیکھتے ہیں تو یہ نوری سالوں میں بھی ناپی نہیں جا سکتی۔ کہکشائیں ہیں، جھرمٹ ہیں اور بے شمار نظام شمسی، مگر سب ایک ہی نظام کے تحت منظم ہیں۔ قرآن نے اسی حقیقت کو دو لفظوں میں سمیٹ دیا: "رب العالمین"، یعنی یہ صرف ایک جہان نہیں بلکہ بے شمار جہانوں کا مجموعہ ہے، اور ان سب کا پروردگار صرف ایک ہی ہے۔

انسان اگر چاہے تو صرف اپنی روزمرہ زندگی میں کھائے گئے ایک لقمے پر غور کرے۔ اس لقمے تک پہنچنے کے پیچھے کس قدر طویل اور پیچیدہ نظام کام کرتا ہے! بارش، زمین، کھیتی، کسان، مزدور، دھوپ، ہوا، پانی یہ سب ایک ترتیب کے ساتھ چل رہے ہیں۔ یہ ہے اللہ کی ربوبیت کہ وہ ہر ذرے کو اپنی تدبیر سے سنبھالتا اور ہر مخلوق کی ضرورت پوری کرتا ہے۔ یہی وجہ ہے کہ عقلِ سلیم یہ فیصلہ کرتی ہے کہ اس ربوبیت میں اللہ کا کوئی شریک نہیں۔

قرآن بار بار کائنات کے مظاہر کی طرف توجہ دلاتا ہے۔ جیسا کہ فرمایا گیا
"بیشک آسمانوں اور زمین کی پیدائش اور رات اور دن کی تبدیلی میں اور کشتی میں جو دریا میں لوگوں کے فائدے لے کر چلتی ہے اور اس پانی میں جو اللہ نے آسمان سے اتارا پھر اس کے ساتھ مردہ زمین کو زندگی بخشی اور زمین میں ہر قسم کے جانور پھیلائے اور ہواؤں کی گردش اور وہ بادل جو آسمان اور زمین کے درمیان حکم کے پابند ہیں ان سب میں یقینا عقلمندوں کے لئے نشانیاں ہیں ۔" _{(البقرہ: 164)}

اگر خدا ایک سے زیادہ ہوتے تو ہر ایک اپنی اپنی مخلوق کو الگ کر لیتا، اور پھر لازماً ان میں ٹکراؤ پیدا ہوتا۔ قرآن نے صاف فرمایا:
"اگر آسمان و زمین میں اللہ کے سوا اورمعبود ہوتے تو ضرور آسمان و زمین تباہ ہوجاتے"_{(الانبیاء: 22)}

کائنات کا موجودہ نظام اس بات کا زندہ ثبوت ہے کہ منتظم صرف ایک ہے۔ ہر چیز ایک ہی قوت کے حکم کے تابع ہے۔ اجرام فلکی ایک دوسرے کو کھینچتے بھی ہیں اور دھکیلتے بھی ہیں، لیکن اس میں ایسا توازن ہے کہ نہ وہ ٹکراتے ہیں اور نہ ہی بے ربط ہو جاتے ہیں۔ یہی وہ نظم اور حسن ہے جو بتاتا ہے کہ کائنات کا منتظم ایک ہے۔ قرآن کہتا ہے:
"تو رحمٰن کے بنانے میں کوئی فرق نہیں دیکھے گا پس تو نگاہ اٹھا کر دیکھ، کیاتجھے کوئی رخنہ نظر آتا ہے ؟" _{(الملک: 3-4)}

پس آفاقی دلائل بھی ہمیں یہی پیغام دیتے ہیں کہ اللہ ایک ہی ہے، وہی رب العالمین ہے، اور اس کی ذات و صفات میں کسی اور کے لیے کوئی جگہ نہیں۔

پڑھیں / القرآن

خداایک سے زائد کیوں نہیں ہوسکتے؟

فہرست

دلیلِ کبریائی

دلیلِ حفظِ اسرار

دلیلِ تدبیر و انتظام

دلیلِ وصفِ امتیازی

برہانِ تمانع

آفاقی دلیل

فہرست