Seven Pillars of Humanism

ہیومنزم کے سات بنیادی عناصر

ہیومن ازم اپنے عمومی تصور اور مفہوم میں ایک سادہ سی بات ہے جس کے قائل مذہبی لوگ بھی ہیں۔چنانچہ اس پہلو سے لوگ اسلام کی اخلاقی تعلیمات / تصوف وغیرہ سے مربوط کر کے بھی اس کا مطالعہ کرتے ہیں۔ لیکن ہیومن ازم ایک مربوط نظامِ افکار کے طور پر کوئی ایسی چیز نہیں جس کو چھوٹتے ہی "اسلامائزیشن" کے مرحلے سے گزارنے کی سفارش کی جائے۔ یہ نظامِ فکر "انسان" کے "خود کوزہ وخود کوزہ گر وخود گل کوزہ" کے فلسفے پر یقین رکھتا ہے۔یعنی کہ انسان ہی سب کچھ ہے۔ انسان ہی خود خدا ہے، انسان ہی اس کائنات کا خالق ہے، اور انسان ہی خود مخلوق ہے۔ خاص طور پر الحادی ہیومن ازم پر Jean Paul Sartre ژاں پال سارتر جیسے ملحد فلسفیوں کی وجودیت (Existentialism ) کے گہرے اثرات ہیں۔ ایک نظامِ افکار کے طور پر ہیومن ازم کے قائلین کے افکار میں مندرجہ ذیل سات چیزیں جزوِ لاینفک ہیں یعنی ہیومنزم میں یہ سات چیزیں بنیاد کی حیثیت رکھتی ہے، جنھیں آکسفرڈ سے شائع ہونے والی Stephen Law کی مختصر کتاب Humanism سے اپنے الفاظ میں پیش کیا جاتا ہے، تفصیل کے لیے کتاب دیکھی جا سکتی ہے۔مصنفِ کتاب سٹیفن لا ، لندن کے ایک انگریز فلسفی ہیں۔وہ سات بنیادی عناصر درج ذیل ہیں۔

1- ہیومنسٹ حضرات کے نزدیک science اور reason و ہ دو فیصلہ کن کسوٹیاں ہیں جن پر زندگی کے تمام مظاہر کو پرکھا جانا چاہیے۔کوئی بھی نظامِ فکروعقیدہ عقلی جانچ پرکھ( rational scrutiny) سے بالا تر نہیں سمجھا جا سکتا۔یعنی کہ Metaphysical اشیاء کا انکار کرنا۔جس میں خدا کا وجود، فرشتہ، جنت و جہنم وغیرہ ہے۔
2- ہیومنسٹ حضرات دہریے(atheists ) (خدا کے منکر)یا کم از کم لاادری(agnostic) (خدا کے بارے میں عدمِ علم کے تصور پر یقین رکھنے والے)ہیں۔ وہ خدا کے وجود کے بارے میں متشکک(sceptical) ہیں۔ اسی طرح وہ فرشتوں، شیاطین اور دیگر مافوق الفطرت تصورات کے بارے میں بھی شک کا شکار ہیں۔
3- ہیومنسٹ حضرات مَا هِيَ إِلا حَيَاتُنَا الدُّنْيَا نَمُوتُ وَنَحْيَا (عیش توبس دنیا ہی کا ہے جس میں ہم جیتے مرتے ہیں۔ ) پر یقین رکھتے ہیں اور"بابر بہ عیش کوش کہ عالم دوبارہ نیست" یعنی کہ دنیا عیش کرنے کی جگہ ہے، اور یہ دنیا دوبارہ نہیں ملنی تو یہاں عیش و عشرت والی زندگی گزارنی چاہیے۔ ان کا مطمحِ نظر ہے، جنت ودوزخ محض ڈھکوسلے ہیں۔یہ افکار نظام عقیدہ کے لیے rational scrutiny کو معیار قرار دینے کا لازمی نتیجہ ہیں۔
4- یہ حضرات اخلاقی اقدار کی اہمیت کے قائل ضرور ہیں۔وہ کہتے ہیں کہ ہماری اخلاقیات کو ان چیزوں پر ہونا چاہیے جو واقعتا انسانیت کو پسند ہیں اور ان کی دنیاوی زندگی کو بہتر بنا سکتے ہیں۔ وہ اس طرح کے دعووں کو رد کرتے ہیں کہ جس میں کہا جائے کہ" کسی خدا کے بغیر بھی اخلاقیات کو وجود ہو سکتا ہےیا کسی خدا یا مذہب کے بغیر بھی ہم اچھے ہو سکتے ہیں"، تاہم وہ مذہب اور عقیدے کے علاوہ دیگر امور کی بنیاد پر بھی اخلاق کی توجیہ پیش کرتے ہیں۔
5- یہ ہماری انفرادی ذمے داری ہے کہ ہم اپنے اخلاقی تصورات کا تعین کریں، بجائے اس کے کہ ہم یہ ذمے داری خدا یا مذہب جیسی کسی خارجی چیز کو بخشیں۔
6- ہماری زندگیاں کسی خدا ئی مداخلت کے بغیر بھی با معنی ہو سکتی ہیں۔مثال کے طور پر پبلو پکاسو، آئن سٹائن وغیرہ کی زندگیاں بھرپور اور معنویت سے پر تھیں، خواہ وہاں خدا ہو یا نہ ہو۔
7- ہیومنسٹ حضرات سیکولر ہیں۔ وہ ایک ایسے جمہوری سماج کی تشکیل کے خواہاں ہیں، جہاں ریاست مذہب کے بارے میں غیر جانب دار رہتی ہے، افراد کو اس معاملے میں آزادی بخشتی ہے کہ افکار چاہے مذہبی ہوں یا الحادی، انھیں ان پر نقد کا پورا حق حاصل ہے، وغیرہ۔ (Humanism ,p:17, 18)

نظریہ ہیومنزم (انسان پرستی) در اصل اپنے وجود کو خدا کی جگہ پر رکھنا ہے۔ خود اپنے آپ کو خدا بنانا ہے۔ انسان کی عظمت، انسان کی خواہشات، انسان کے نفس کو اس نظریہ میں اولین ترجیح حاصل ہے۔ انسان اس نظریہ کو اپنا کر اپنی خواہشات کو خدا بنالیتا ہے۔ جیسے کہ اللہ تعالی نے بھی فرمایا کہ:

من اتخذ الہہ ھواہ یعنی جس نے اپنی خواہشات کو اپنا خدا بنا لیا۔یہ نظریہ انسان کو بالآخر ملحد خدا کا منکر بنادیتا ہے۔

پڑھیں / سیکولرزم

ہیومنزم (انسان پرستی) کے سات بنیادی عناصر

فہرست

تعارف

فہرست